Rebecca 的部落格

完成工聯會這個禮帽裝飾班，我終於可以發表一下我對這個興趣班的感受。

我喜歡做手作，又鍾意做 d 靚嘢，所以學做婚紗禮帽。工聯會舉辦的興趣班出名收費便宜，質素不俗，所以我就報名了！但我這位中年導師謝X娥的教學態度真係不敢恭維！

上這個興趣班，堂堂都有同學俾佢罵 …… 佢教好多班，一路上堂一路就講其他課堂d同學仔點衰點衰 ……我好相信佢教其他課堂時，都會話我哋呢班同學點點點 ……

我明明訂咗幾隻顏色的緞布 (深紫、淺紫、銀色、啡色、米色和蝦肉色)，但派布嗰一堂我返唔到，於是我預先電郵俾 Miss告假，及叫佢留番 d 布俾我下堂攞。點知 ……

到我返學，問 Miss 攞返我預先訂咗嘅緞布，佢好大聲好惡咁問我：「咩布呀？無喎！」

我話我之前有落訂的，佢查查訂購表格，見到我有填寫所訂的布，佢先至分派 d 緞布俾我，但已經無晒蝦肉色布，佢好串咁同我講：「你訂嘅蝦肉色布無晒貨啦喎！我上堂賣晒俾其他同學啦！你要嘅話我同你再補訂另一隻近似嘅顏色啦！」

我問佢：「咁有無色辦睇睇究竟係咩顏色？」

佢依然係好串咁講：「無喎！萬一我買咗d布返來無人要咁點呀？」(我問色辦咋喎！唔係話成匹布喎！)

我點知佢隻顏色係點？所以我最後都無買到。

我上咗婚紗禮帽裝飾初班，都學到我想學的東西，所以上埋佢嘅進階班。但進階班佢就教得好 hea，佢嘅入室弟子因為有事好多堂無返，Miss 就無晒心機教我哋啦！我整咗幾百片花瓣返學，佢眼尾都無睇過，到咗最後嗰堂，咁啱我就無帶到嗰幾百片花瓣，Miss就話無同學帶d花瓣返學，所以佢教唔到我哋…… 我同另一位同學只有不禁對望 …… (於是我就利用嗰幾百片花瓣做呢個花球同禮帽花囉！)

佢仲有教其他興趣班，包括禮帽基礎製作、婚紗禮帽裝飾、新娘皇冠穿製工藝、古今龍鳳頭飾工藝、歐洲古典飾物製作工藝等 …… 我梗係唔敢再報佢嘅興趣班啦！我唔係自虐到要俾錢人哋罵我呀！？

不過我知道都有好多同學仔報 Miss 其他興趣班，因為佢哋係開舖頭或都從事婚慶行業嘅，佢哋梗係想學多 d 嘢放喺自己舖頭賣啦！

我只係為興趣，我覺得上興趣班都要俾人罵同受氣係會令到我好唔開心，同埋我真係好怕 d人成日呻呢樣呻嗰樣 …… 話說回頭，如果你頂得順佢嘅態度同脾氣，你都可以報吓佢教 d 興趣班嘅！因為真係可以學到整幾多靚嘢！