Rebecca 的部落格

以下為本人去雲南旅遊的溫馨提示及個人感受：

(1)    我臨出發前在藝龍網訂客棧及酒店，網上有好多選擇，但要有大陸手提電話號碼 (for接收短信確認訂房是否成功) 及內地銀行卡或信用卡付款；其實麗江的客棧多的是，你可以去到才慢慢選擇，不用預先訂，價錢最便宜50人民幣都可以有一間。

(2)    機場無公車直接去麗江古城，包車一般是80人民幣(單程，可載4人)，如你預約了客棧，可向客棧要求免費接送。

(3)    麗江古城的路是中環石板街那種凹凸不平的，所以建議你唔好拖喼，揹背囊比較適合。

   

(4)    雲南的陽光好猛烈，男女都記住帶防曬物品。

(5)    一定要帶平安藥，因為食物和環境衛生一般。

(6)    買嘢記住格價同講價。

(7)    如果想報當地團，自己走入古城格價，這裡旅行社成行成市，報最便宜的當地團就得，什麼湖景房、什麼加餐費都不用加！因為加幾多錢都只係落喺旅行社嘅口袋，不會因你加咗錢而upgrade個團的！

(8)    千祈唔好幫襯你住緊間客棧介紹俾你嘅團。真人真事，我在古城入面嘅旅行社俾咗350蚊報團，但係有團友報客棧介紹俾佢嘅團，俾咗680蚊，而事實上佢咪做咗我團友囉！(兩者相差330蚊，價錢接近一倍！點解呢？個差價咪就係客棧老闆袋咗囉！)

(9)    包車去香格里拉或者瀘沽湖等地點玩幾日的價錢一定會比參加當地團貴。但約埋四個朋友一齊包車應該可以食好d、住好d、同埋唔使強迫你購物；相反，好似我報當地團，比包車便宜，但係就有俾人賣豬仔嘅感覺。你自己取捨。

(10)問過當地人，去香格里拉的最佳季節係七、八月份 (但同時亦係雨季)。

(11)奉勸各位：千祈唔好去瀘沽湖！嗰度已經唔係大家想睇嘅“神秘摩梭女兒國”！嗰度以旅遊業為生，佢哋係專登表演d歌舞、唱山歌及講解走婚過程俾你睇囉！(感覺好似去集古村或者宋城咁囉！) 而實際上，今時今日嘅摩梭族已經唔係咁樣架啦！我真係好唔鍾意咁虛假嘅感覺，要我來回搭十二個鐘頭車睇d咁嘅嘢我覺得完全唔值囉！

(12)我個摩梭族導遊一開波唔係介紹自己，而係罵團友！仲係好唔客氣嗰隻！佢話之前一晚十一點先有齊我哋五十位團友嘅名單，逐個通知我哋嘅集合時間，攪到佢兩點先瞓！關我哋咩事呢？你哋旅行社安排得差之嘛！原先話喺束河大門口集合，之後話要去大水車，跟住又改返去束河大門口集合，依個係你哋嘅問題，安排咁差，梗係要打咁多次電話啦！佢又話我哋所簽嘅合約是死的，人是生的……廢話！咁即係預咗貨不對辦啦！我都唔知點解國內的服務態度真係咁差！？

(13)呢個兩天團，導遊係完全無講過集合時間，一朝早我在束河大門口集合，再開車到大研古城的大水車接其他團友，等咗好耐d團友都未出現，於是我就同佢講話想去廁所，佢話唔得，我話d團友都未到，佢都仍然話唔俾我去，我忍唔到啦！於是自己走咗過對面賓館上廁所！之後，抵達每個景點都係自動波落車上車，都無同我哋講過集合時間，所以整個旅程真係等人多過玩。

(14)雲南氣候好乾燥，成日都想飲水，但係嗰度每個景點、餐廳嘅廁所都係極級污糟的！係無水沖廁，一舊舊金喺你下面嗰種！亦都無水洗手！我呢兩日都係被迫忍住忍到返酒店先至去！好辛苦！所以你要好好平衡飲水與上廁所的比例 ( 這是一個超高難度的技術！) 同埋帶備消毒洗手液。

        

(15)整個旅程辛苦唔在講，最唔抵係個摩梭族導遊梗屈我哋俾150人民幣改豪華餐，又話加咗錢可以食好好味的烤雞……佢見我哋唔多願意俾，仲感人肺腑話佢哋d人受到地震影響，好慘架！你哋當扶貧震災啦！(真係有需要的災民，我一定會幫助，但我好相信呢150人民幣係會全數入你袋囉！) 但係加咗錢都仍舊食得好能差就真係好嬲！我真係未食過d咁差嘅嘢！ (後來發現我唔係最笨七的一個，因為佢先前帶的團，佢老屈團友加350餐費) 不過，如果你係想短時間內減肥就立即參加呢個“瀘沽湖笨七兩天團”啦！

(16)我加咗錢住湖景房，卻發現其實加唔加都係瞓同樣嘅房！張床好“淋”，攪到瞓得唔好；廁所仲係透明玻璃透出房的，你哋係情侶就話無所謂啫！如果你哋係兩個女仔、兩個男仔或者兩父女 (e.g. Queenie同佢爸爸) 一間房就尷尬死啦！

(17)報團時雖然話明唔會強迫購物，但係導遊帶我哋去銀器店同土產店參觀就係第二日嘅唯一節目啦！我唔買都要企喺門口等！真係勁悶勁無聊！

(18)個旅遊巴司機都好衰，每次開車都係唔開空調的，我要開口請求佢，佢都要俾說話我聽，求咗佢一大輪先至肯開空調！

(19)嗰度d人好鍾意講說話食女仔豆腐，例如去拉市海騎馬，個男人拿住支啤酒一路行一路飲，你明知佢係講咸濕嘢架啦！咪當聽唔到囉！

(20)麗江出咗名係來玩樂嘅地方，酒吧成行成市，大家係來尋開心、求豔遇的。出來玩嘅時候記住要小心d囉！

(21)如果時間有限，建議只留在麗江玩，昆明可以唔去。