2013年4月6日 (第四日) 輕井澤 – 新宿－Rebecca 的部落格

2013年4月6日 (星期六) 天陰有雨

(第三天使用Kanto Area Pass)

酒店房露台外面的景色

今早起床，已經大霧彌漫，我們吃過早餐就乘巴士往白絲瀑布參觀，沿途好像走入了一個大森林，加埋下雨天，感覺淒美。

巴士沿途經過舊三笠賓館

坐了半個鐘頭巴士 (710 yen) 終於到達白絲瀑布。其實嗰度地方好細，無咩嘢影！但B小姐都好興奮咁係咁影！背景係一條橋影幾十張，背景係一個瀑布又影幾十張……如是者等佢影完晒啦！我先至有機會‘攝’埋去影一兩張！影完啱啱miss 咗一班車，要等多一個鐘頭先有另一班車，B小姐說：「乜唔搭早一班車呀？呢度都無乜嘢睇嘅！」(其實我都想搭早一班車呀！姐姐！但係你係咁影相囉！)

我們再乘巴士回程，在新道站落車，步行到雲場池。

嗰陣時B小姐又問：「乜我哋唔係去“舊三笠賓館”咩？」( 我夠想去埋啦！但係由於時間關係…… )

去到雲場池，真係好大霧，咩都睇唔到，我真係唔明點解呢度可以係作為影婚紗想嘅熱門景點？！

所有相片都是OUT OF FOCUS 的 (FOCUS咗喺隻鴨度, 我變咗大茄)

B小姐喺同一個地點都可以影幾十張，明知佢哋點影我都唔會影得好睇，影一千張都係會唔靚，我都無乜心機，而且最大要害是她們都不懂用 Pre-focus 呢個 function，所以佢哋影我嘅每一張相都係 out of focus 的！我唯有自己影下鴨仔啦！

唯一在雲場池 focus 到我的一張相, 好珍貴!

這條裙子是金屬造的

行到一點幾，我哋到咗一間餐廳吃午餐，叫了一客天婦羅冷蕎麥麪 (1,650 yen, 不過沒有昨天的冷烏冬那麼好食！)

食完午餐，等埋B小姐訂新幹線車票去名古屋，就快快去行 outlet 了！B小姐中途繼續往名古屋的行程，而我和A小姐就由兩點半行到五點，然後乘坐新幹線返回東京，再由東京乘中央線(快速)，返到新宿駅已經七點幾了。

去到新宿駅好大雨，把雨傘已在輕井澤吹壞了，十分狼狽！幸好在新宿駅外的煲煙區遇到一位好好人的哥哥，佢正在煲煙之際，被我打擾問路，佢仲好好人咁帶我哋由新宿駅行到去位於歌舞伎町的酒店 Hotel Wing International ( 永安買的套票，連續住三晚 )，其實路程真係唔遠，從歌舞伎町一番街牌坊直入第二個路口就到酒店，但下雨加上拖住行李真係覺得條路好遙遠！哥哥一路行一路仲同我講佢喺伊勢丹百貨公司工作，是全日本第一大百貨公司，叫我記住要去逛逛呢！ ( 好hard sell的員工！)